2Ki 4 | PMA | STEP | Avong tai, vatina tai mai ven Elisa ka viteni mini vit, “Asuv, meatin onak koa vi tai en provet onom kei mat tuai. Keik kokilea keke kei vi meatin koa vouhou en Iahova. Navong kei mul semau moul, vis meatin tai en mane. Ka kosa, meatin koa san mane enek mini, mai les nau keke vakur titiali elu onak luvahi slev onen vahul lat kaon onen meatin onak.”

2 Kings 4

Provet Elisa Kataun Vatina Tai koa Tounah onen Tovuol

2 King 4:1-7

1 Avong tai, vatina tai mai ven Elisa ka viteni mini vit, “Asuv, meatin onak koa vi tai en provet onom kei mat tuai. Keik kokilea keke kei vi meatin koa vouhou en Iahova. Navong kei mul semau moul, vis meatin tai en mane. Ka kosa, meatin koa san mane enek mini, mai les nau keke vakur titiali elu onak luvahi slev onen vahul lat kaon onen meatin onak.”

2 Elisa viteni min vatina enek vit, “?Emvati makataunuk vamukave? ?Kihiteni minau, asa kovuli kati mul teim?”

Vatina vit kesi mini vit, “Tounah tovuol. Vei oel ten olip tanges mul.”

3 Sakini Elisa viteni mini vit, “Kiha ven meatin keil koa aro vesesal venuk, ka kihis keil keke avasan veioel keil minuk koa avi heite hon. Kilahi hehi houlu. 4 Hevus, keik hetal min natnali keilu, mitheha en eim ka mitheoteh kat voiteh. Hevus, kitah oel heha en veioel keil enek. Navong kitah oel heha en tai hehil, kilingi heles ka kikur teisav. Kumoni hemukonek heha vio ... keil vasi ihilelau.”

5 Sakini, vatina enek va ka mum usil selusien onen. Kei va teim ral min natnali keilu ka telkoteh en voiteh. Evus, kur titi veioel onen, ka mutah oel teni va en veioel keil koa natnali keilu lulahi lumai lusani mini. 6 Navong telsien veioel keil enek vil, vatina vis keilu en veioel tamun. Ka tai en natnali keilu viteni mini vit, “Mama, veioel tovuol emun.” Mal en hati avong enek, oel memes revi varei.

7 Evus, vatina enek mu ris va les provet Elisa, ka provet viteni mini vit, “Kiha, ihul oel enek ranuk ka kihul lat kaon onom. Ka hati mane koa heles, hevinvin hekataunuk ka natmali keilu.”